18 February 2022

విమర్శ

జీవార్థమైన ఉపదేశమును అంగీకరించు వానికి జ్ఞానుల సహవాసము లభించును . గద్దింపును వినువాడు వివేకి అగును ( సామెతలు 15 : 31,32 ) .

ఎదుటివారు మనలను విమర్శించినప్పుడు మన స్పందన ఎట్లు ఉన్నది ? విమర్శను శ్రద్ధగా తీసుకొనువారికి విజయము ప్రాప్తించును . గద్దింపును నిర్లక్ష్య పెట్టువారికి అపజయము లభించును . నార్వే దేశమునకు చెందిన ఓలేబుల్ ( Ole Bull ) 1810 ఫిబ్రవరి 5 వ తేదీన జన్మించారు . తన 17 వ ఏట వయోలిన్ నేర్చుకొని ప్రదర్శనలు ఇచ్చుటకు ఇటలీ వెళ్లాడు . మొదటి కచేరి అనంతరము ఒక వార్త పత్రికలో  ఓలేబుల్ నేర్చుకోవలసినది చాలా ఉన్నది . అతడు రత్నం వంటివాడు . కాని ఇంకా మెరుగు పెట్టితేనే కాని రాణించడు  అని అతని గురించి వ్రాసారు . ఆ విమర్శ చదివి ఓలేబుల్ కోపం తెచ్చుకొనవచ్చును లేదా గద్దింపును లక్ష్యపెట్టవచ్చును . అదృష్టవశాత్తు ఓలేబుల్ రెండవ దానిని ఎన్ను కొన్నాడు . అతడు వార్తా పత్రిక ఆఫీసుకు వెళ్ళి తనను విమర్శించినది ఎవరో తెలుసుకొని ఆయన ఇంటికి వెళ్లాడు . విమర్శించినది 70 సంవత్సరముల వయస్సు గల ఒక వృద్ధుడు . ఒక రోజు అంతా ఓలేబుల్ అతని వద్ద కూర్చొని తన లోపములు ఏమిటో అడిగి తెలుసుకొన్నాడు . వాటిని ఎలా సవరించు కోవాలో తెలుసుకొన్నాడు . అతడు ప్రదర్శనలు ఇచ్చుటకు ఇటలీలో పర్యటించుట మానివేసి ఇంటికి వచ్చి ఆరు నెలల పాటు సమర్ధులైన గురువుల వద్ద జాగ్రత్తగా నేర్చుకొని గంటల తరబడి ప్రాక్టీసు చేసి తిరిగి ప్రదర్శనలు ఇచ్చుటకు ఐరోపా ఖండమంతా తిరిగాడు . 26 సంవత్సరములు వచ్చే సరికి అతడు గొప్ప పేరు ప్రఖ్యాతులు సంపాదించాడు .

మనము గద్దింపును లక్ష్యపెట్టుచున్నామా ? పాస్టరు గారు మన దుస్తుల గురించి , ప్రవర్తన గురించి గద్దించినప్పుడు లక్ష్యపెట్టుచున్నామా ? లేదా కోపగించుకొని వేరే చర్చికి వెళ్లుచున్నామా ? ఉపదేశమును అంగీకరించువాడు జీవమార్గములో ఉన్నాడు . గద్దింపునకు లోబడని వాడు త్రోవ తప్పును ( సామెతలు 10:17 ) . -

డా॥పి.బి. మనోహర్