25 July 2026

వారసత్వం

ఒక ఊరిలో ఎనిమిది సంవత్సరాల వయస్సు ఉన్న ఒక చిన్న బాలుడు తన ఇంటి ముందు కూర్చొని, ఒక కాగితాన్ని చుట్టి నోట్లో పెట్టుకొని సిగరెట్ తాగుతున్నట్లు నటిస్తున్నాడు. అది చూసి ఆశ్చర్యపోయిన నేను అతని తల్లిని అడిగాను, "బాబు ఇలా ఎందుకు చేస్తున్నాడు?" అని. అప్పుడు ఆమె చెప్పింది, "వాడి నాన్నకు సిగరెట్ తాగే అలవాటు ఉంది. ప్రతిరోజూ అది చూస్తూ ఉండడంతో, ఇప్పుడు వాడు కూడా తన తండ్రిని అనుకరిస్తున్నాడు" అని. ఈ సంఘటన మనకు ఒక గొప్ప సత్యాన్ని గుర్తు చేస్తుంది. పిల్లలు మన మాటలకంటే మన జీవితాన్ని ఎక్కువగా గమనిస్తారు. వారు మనం చెప్పింది మాత్రమే కాదు, మనం చేసే పనులను కూడా అనుకరిస్తారు. అందుకే మన అలవాట్లు, మన నడవడి, మన జీవన విధానం చాలా ముఖ్యమైనవి. ఈ విషయాన్నే ద్వితియోపదేశకాండము 6వ అధ్యాయం ఎంతో అందంగా బోధిస్తుంది. దేవుడు మోషే ద్వారా ఇశ్రాయేలీయులకు తన ఆజ్ఞలను ఇచ్చి, వాటిని కేవలం తామే పాటించడం కాదు, తమ పిల్లలకు కూడా శ్రద్ధగా నేర్పించాలని ఆజ్ఞాపించాడు. దేవునిని భయభక్తులతో ప్రేమించడం, ఆయన ఆజ్ఞలను పాటించడం, వాటిని తర్వాతి తరాలకు అందించడం ప్రతి తల్లిదండ్రి బాధ్యత అని తెలియజేశాడు. దేవుని వాక్యాన్ని మన హృదయంలో నిలుపుకున్నప్పుడు, ప్రతి రోజు జరిగే చిన్న చిన్న సందర్భాల్లో కూడా పిల్లలకు దేవుని ప్రేమను, సత్యాన్ని బోధించే అవకాశం మనకు లభిస్తుంది. మన జీవితం దేవునికి విధేయంగా ఉంటే, పిల్లలు కూడా అదే మార్గంలో నడవడానికి ప్రోత్సాహం పొందుతారు. విధేయత అనేది వ్యక్తిగతమైనదే అయినప్పటికీ, అది కుటుంబంపై కూడా గొప్ప ప్రభావాన్ని చూపుతుంది. తల్లిదండ్రులు దేవుని వాక్యాన్ని ప్రేమించి, దాని ప్రకారం జీవిస్తే, వారి పిల్లలు కూడా దేవుని యందు విశ్వాసంతో ఎదిగి, ఆయనను ప్రేమించి, ఆయనకు విధేయులుగా జీవించడం నేర్చుకుంటారు. మన హృదయంలో ఏమి నింపుకుంటామో, అదే మన మాటల్లో, మన ప్రవర్తనలో కనిపిస్తుంది. మన జీవితం ద్వారా మన పిల్లలకు, మన చుట్టూ ఉన్నవారికి విశ్వాసానికి మంచి ఆదర్శంగా ఉండగలం. ఒక తరం నుండి మరొక తరానికి అందించే అత్యంత విలువైన వారసత్వం దేవుని యందు ఉన్న విశ్వాసమే. కాబట్టి మనం దేవుని వాక్యాన్ని ప్రేమించి, దాని ప్రకారం జీవిస్తూ, మన పిల్లలకు మంచి ఆదర్శంగా నిలుద్దాం. అప్పుడు మన కుటుంబాలు దేవుని ఆశీర్వాదాలను అనుభవిస్తాయి. ఆమెన్.