20 July 2026
దేవుడు ఆశీర్వదించిన జీవిత లక్షణాలు
ఒక గ్రామంలో ఇద్దరు రైతులు ఉండేవారు. ఒకరు త్వరగా పెరిగే పంటలనే ఎంచుకునేవాడు. మరొక రైతు మాత్రం నీటికాలువ పక్కన ఒక మామిడి మొక్కను నాటాడు. గ్రామస్థులు అతన్ని చూసి, "పంటలు వేయకుండా చెట్టు పెంచుతున్నావా? దీనికి ఫలాలు రావడానికి చాలా సంవత్సరాలు పడతాయి!" అని ఎగతాళి చేసేవారు.
కానీ ఆ రైతు తొందరపడలేదు. ప్రతిరోజూ మొక్కకు నీరు పోసి, దానిని జాగ్రత్తగా పెంచాడు.
సంవత్సరాలు గడిచాయి. ఒకసారి తీవ్రమైన కరువు వచ్చింది. పొలాల్లోని పంటలన్నీ ఎండిపోయాయి. అయితే నీటికాలువ పక్కన ఉన్న ఆ మామిడి చెట్టు మాత్రం పచ్చగా నిలిచి, సమయానికి తియ్యని ఫలాలను ఇచ్చింది.
అప్పుడు గ్రామస్థులు ఆశ్చర్యపోయారు. రైతు చిరునవ్వుతో, "లోతైన వేర్లు ఉన్న చెట్టు తుఫాన్లను భయపడదు. నీటి దగ్గర నాటబడిన చెట్టు తన కాలంలో తప్పకుండా ఫలిస్తుంది," అన్నాడు.
అలాగే దేవుడు ఆశీర్వదించిన జీవితం కూడా దేవుని వాక్యంపై నిలబడుతుంది. వెంటనే ఫలితం కనిపించకపోయినా, దేవుడు తన సమయములో స్థిరమైన ఆశీర్వాదాన్ని ఇస్తాడు. నీటికాలువ యొద్ద నాటబడిన చెట్టులా, దేవునిపై ఆధారపడిన జీవితం ఎప్పుడూ వాడిపోదు; తన కాలమందు తప్పకుండా ఫలిస్తుంది.
దేవుడు ఆశీర్వదించిన జీవితం బయట కనిపించే విజయాలతో మాత్రమే గుర్తించబడదు, కానీ లోపల ఉన్న స్థిరత్వం మరియు దేవునిపై ఉన్న ఆధారపడే మనసుతో గుర్తించబడుతుంది.
కీర్తన 1 ప్రకారం దేవుడు ఆశీర్వదించిన మనిషి దుష్టుల ఆలోచనలను అనుసరించడు, పాపుల మార్గంలో నిలబడడు, అపహాస్యుల సమూహంలో కూర్చోనడు. అతడు దేవుని వాక్యములో ఆనందిస్తాడు. అంటే దేవుడు ఆశీర్వదించిన జీవితం దేవుని వాక్యంపై నిలబడిన జీవితం. ప్రపంచం మారినా, పరిస్థితులు మారినా, దేవుని వాక్యాన్ని ఆధారంగా తీసుకున్న జీవితం నిలబడుతుంది.
అటువంటి వ్యక్తి నీటి వాగుల యొద్ద నాటబడిన చెట్టులా ఉంటాడు. కాలం వచ్చినప్పుడు ఫలిస్తాడు. ఆకులు వాడిపోవు. ఇది దేవుని ఆశీర్వాదం యొక్క గొప్ప గుర్తు. వెంటనే ఫలితం రాకపోయినా దేవుడు తన సమయములో ఆశీర్వదిస్తాడు. కొన్నిసార్లు మనం ఇతరులను చూసి తొందరపడతాము, కానీ దేవుడు మనలను స్థిరంగా, బలంగా తయారు చేసి తర్వాత ఆశీర్వదిస్తాడు. దేవుడు ఆశీర్వదించిన జీవితం ఆలస్యమైనా, స్థిరమైన ఫలితాన్ని ఇస్తుంది.
